Таҳти ин унвон имрӯз (09.01.2025) дар Донишгоҳи давлатии Кӯлоб ба номи Абуабдуллоҳи Рӯдакӣ аз ҷониби факултети иқтисод ва идора ҳамоиши илмӣ-назариявӣ дар ҳошияи Паёми Президенти Ҷумҳурии Тоҷикистон муҳтарам Эмомалӣ Раҳмон дар бораи самтҳои асосии сиёсати дохилӣ ва хориҷии ҷумҳурӣ бо иштироки садорати факултет ва ҳайати омӯзгорони факултет баргузор гардид.
Сараввал декани факултет, номзади илмҳои иқтисодӣ, дотсент Расулова Лутфия суханронӣ намуда, ҳамоишро ҳусни оғоз бахшид. Ҳамзамон иброз доштанд, ки Паёми Пешвои миллат Эмомалӣ Раҳмон ба Маҷлиси Олии Ҷумҳурии Тоҷикистон муҳимтарин ҳуҷҷати роҳнамо мебошад, ки самтҳои стратегии рушди кишварро муайян мекунад. Он масъалаҳои сиёсӣ, иқтисодӣ, иҷтимоӣ ва фарҳангиро фаро гирифта, барои баланд бардоштани сатҳи зиндагии мардум ва таҳкими амният равона шудааст.
Сипас, номзади илмҳои иқтисодӣ, дотсенти кафедраи иқтисодиёти корхонаҳо ва соҳибкорӣ Фатҳуллозода Абдухолиқ дар мавзуи “Таҳлили вазъияти иқтисодӣ ва ислоҳоти низоми молиявии кишвар дар Паём”, номзади илмҳои география, муаллими калони кафедраи география ва сайёҳӣ Иброҳимова Рухшона дар мавзуи “Тоҷикистон ташаббускори масъалаҳои асосии ҳифзи пиряхҳо дар сайёраи Замин” ва ассистенти кафедраи менеҷмент ва маркетинг Қурбонов Некруз дар мавзуи “Ғайринақдӣ кардани амнияти иқтисодӣ дар меҳвари Паёми Президенти Ҷумҳурии Тоҷикистон” маърӯзаҳои худро ироа намуданд.
Зимни ҳамоиш, иштирокдорон аҳамияти рушди иқтисодиёт, баланд бардоштани сатҳи зиндагии мардум ва татбиқи ислоҳот дар соҳаҳои маорифу тандурустиро таъкид намуданд. Паём ҳамчун ҳуҷҷати стратегӣ ба ҳама табақаҳои ҷомеа илҳом бахшида, барои пешрафти устувори кишвар заминаи мустаҳкам фароҳам меорад.